पुणे शहर पोलीस भरतीला १६ फेब्रुवारीपासून सुरुवात

पुणे : पुणे शहर पोलीस दलात मोठ्या प्रमाणावर भरती प्रक्रिया राबविण्यात येणार असून ही भरती १६ फेब्रुवारीपासून सुरू होणार असल्याची माहिती पोलीस प्रशासनाने दिली आहे. या भरतीसाठी राज्यभरातून मोठ्या प्रमाणात प्रतिसाद मिळाला असून सुमारे १.३९ लाख उमेदवारांनी अर्ज केले आहेत. पुणे शहर पोलीस भरती प्रक्रिया डिजिटल तंत्रज्ञानाच्या माध्यमातून पूर्णपणे पारदर्शक आणि निष्पक्ष पद्धतीने राबविण्याचा निर्णय पोलीस प्रशासनाने घेतला आहे. ही प्रक्रिया आरएफआयडी (RFID) आणि सीसीटीव्ही (CCTV) प्रणालीच्या निगराणीखाली पार पडणार असून त्यामुळे कोणत्याही प्रकारच्या गैरप्रकाराला आळा बसणार आहे. या भरतीमध्ये पोलीस अंमलदार, वाहनचालक आणि पोलीस बँड्समन अशा पदांचा समावेश आहे. भरती प्रक्रियेतील पहिला टप्पा म्हणून मैदानी व शारीरिक चाचण्या घेतल्या जाणार आहेत. या चाचण्यांमध्ये उमेदवारांची उंची व छाती मोजणी, १०० मीटर धावणे, १६०० मीटर धावणे (महिला उमेदवारांसाठी ८०० मीटर) तसेच गोळाफेक अशा चाचण्यांचा समावेश असेल. शारीरिक चाचणी एकूण १०० गुणांची असणार असून त्यामध्ये किमान ५० गुण मिळवणे अनिवार्य असेल. शारीरिक चाचणीत पात्र ठरलेल्या उमेदवारांची पुढील टप्प्यात लेखी परीक्षा घेतली जाणार आहे. लेखी परीक्षेच्या टप्प्यातही काटेकोर सुरक्षा व्यवस्था ठेवण्यात येणार असून उमेदवारांना मोबाईल फोन किंवा कोणतेही बाह्य संपर्क साधन वापरण्यास मनाई करण्यात येणार आहे. भरती प्रक्रियेदरम्यान कोणत्याही प्रकारचा दलाल, मध्यस्थ किंवा आर्थिक मागणी झाल्यास उमेदवारांनी तत्काळ तक्रार करावी, असे आवाहन प्रशासनाने केले आहे. यासाठी अपर पोलीस आयुक्त (प्रशासन) किंवा लाचलुचपत प्रतिबंधक विभागाशी संपर्क साधण्याचे निर्देश देण्यात आले आहेत. पुणे शहर पोलीस भरती प्रक्रिया पारदर्शक, सुरक्षित आणि गुणवत्ताधारित पद्धतीने पार पडावी, यासाठी पोलीस प्रशासनाकडून सर्वतोपरी खबरदारी घेतली जात असून पात्र उमेदवारांना न्याय मिळावा, हा या भरतीचा मुख्य उद्देश असल्याचे अपर पोलीस आयुक्त श्री. संजय पाटील यांनी स्पष्ट केले आहे.