रायगड पोलीस : ११ फेब्रुवारीपासून अलिबागमध्ये मैदानी चाचणी!

अलिबाग: रायगड जिल्हा पोलीस दलातील रिक्त पदांसाठीची बहुप्रतिक्षित पोलीस भरती प्रक्रिया आता निर्णायक टप्प्यावर पोहोचली असून, येत्या ११ फेब्रुवारीपासून मैदानी चाचणीला सुरुवात होत आहे. या भरती प्रक्रियेसाठी अलिबाग येथील पोलीस मुख्यालय सज्ज झाले असून, हजारो तरुण आपले नशीब अजमावण्यासाठी मैदानावर उतरणार आहेत. यावर्षी रायगड पोलीस दलात शिपाई पदाच्या एकूण ९४ जागा रिक्त आहेत. विशेष म्हणजे या अत्यल्प जागांसाठी तब्बल ३,५६३ अर्ज प्राप्त झाले आहेत. म्हणजेच एका जागेसाठी सुमारे २५४ उमेदवार मैदानात झुंज देणार . दुसरीकडे, पोलीस चालक पदासाठीही मोठी चुरस पाहायला मिळत आहे. चालकाच्या ३ जागांसाठी १८१० उमेदवारांनी अर्ज केले असून, येथे एका जागेसाठी चक्क ६०० हून अधिक उमेदवार स्पर्धेत आहेत. मैदानी चाचणीसाठी अलिबाग पोलीस मुख्यालयाच्या मैदानात सर्व आवश्यक तयारी पूर्ण करण्यात आली आहे. प्रशासनाने उमेदवारांना दिलेल्या वेळेत आणि आवश्यक कागदपत्रांसह हजर राहण्याचे आवाहन केले आहे.